ಕನಸೋ ಇದು ಹುಚ್ಚೋ

ನನ್ನ ಹತ್ತಿರದವರಿಗೆ ಸಾಮಾನ್ಯವಾಗಿ ನನಗೆ ಬೀಳುವ ಹುಚ್ಚು ಕನಸುಗಳ ಬಗ್ಗೆ ತಿಳಿದೇ ಇರುತ್ತದೆ.
ಅದರಲ್ಲೂ ನನಗೆ ತುಂಬ ಪ್ರಿಯವಾದ ಹಾಗೂ ಎಂದೂ ಮರೆಯಲಾಗದ ಎರಡು ಕನಸುಗಳ ಬಗ್ಗೆ ಇಲ್ಲಿ ಬರೆಯಿತ್ತಿದ್ದೇನೆ.

೧. ಒಮ್ಮೆ ಕನಸಿನಲ್ಲಿ ನಮ್ಮಮ್ಮ ಲಾರಿ ಓಡಿಸುತ್ತಿದ್ದ ಹಾಗೆ ಬಿತ್ತು. ನಮ್ಮಮ್ಮ ಎಂದೂ ಯಾವ ಗಾಡಿನೂ ಓಡಿಸಿದವರಲ್ಲ.ಅವರಿಗೆ ಈ ಕನಸಿನ ಬಗ್ಗೆ ಹೇಳಿದಾಗ ಅವರ ಪ್ರತಿಕ್ರಿಯೆ, ಕನಸಲ್ಲಾದ್ರೂ ಒಳ್ಳೆ ಕಾರ್ ಓಡಿಸ್ತಿರೋ ತರಹ ನೀನು ಕಾಣಬಾರದಿತ್ತ ಎಂದು ನನ್ನ ಹಾಸ್ಯ ಮಾಡಿದರು.
೨. ಇನ್ನೊಮ್ಮೆ ನನ್ನ ಕನಸಿನಲ್ಲಿ ಸರ್.ಎಂ.ವಿಶ್ವೇಶ್ವರಯ್ಯನವರನ್ನು ಭೇಟಿ ಮಾಡಿದ್ದೆ. ಅವರು ನನ್ನ ಬೆನ್ನು ತಟ್ಟಿ, ನಮ್ಮಮ್ಮನ ಬಳಿ ಹೋಗಿ, ನೀವು ತುಂಬಾ ಅದೃಷ್ಟವಂತರು ಇಂಥಾ ಒಳ್ಳೆಯ ಮಗಳನ್ನು ಪಡೆಯಲು ಎಂದು ಹೇಳಿದರು.(ಆಮೇಲೆ ಕನಸು ಅಂತ ಗೊತ್ತಾದ್ರೂ, ಕನಸಲ್ಲಾದ್ರೂ ಇಂಥಾ ಒಳ್ಳೆ ಕಾಂಪ್ಲಿಮೆಂಟ್ ಸಿಕ್ತಲ್ಲ ಅಂಥ ಖುಶಿಯಾಯ್ತು)
ಹೀಗೆ ನೂರಾರು ಚಿತ್ರವಿಚಿತ್ರ ಕನಸುಗಳು ಬಿದ್ದಿವೆ,ಬೀಳುತ್ತಲೇ ಇರುತ್ತವೆ.

ನಾನೆಲ್ಲೋ ಓದಿದ್ದೆ,ಮನುಷ್ಯನಿಗೆ ಬೀಳುವ ಕನಸುಗಳನ್ನು ಅವಲೋಕಿಸಿ,ಅವನ ಸ್ವಭಾವದ ಬಗ್ಗೆ ಅರಿಯಬಹುದು ಅಂಥ. ಆಗ ನಾನು ಯೋಚಿಸಿದೆ,ಸಧ್ಯ ನನ್ನ ಕನಸುಗಳನ್ನು ಯಾರೂ ಅವಲೋಕಿಸಿಲ್ಲ.
ಹಾಗಿದ್ದರೆ ಖಂಡಿತಾ ನನಗೆ ಹುಚ್ಚು ಎಂದೇ ಹೇಳುತ್ತಿದ್ದರು.